Naglilihi Ba Ako?

Ito na ang sagot sa tanong ng marami... naglilihi ba ako? Oo naman. Kung ang definition ng lihi ay ang nakababaliw na pagnanasang makain, maamoy, makita, makasama ang isang tao, bagay, hayop o pagkain (0 ang kabaligtaran), yes, guilty ako. Ang kaibahan lang, hindi ako consistent sa hinahanap. Madalas pagkatapos ng dalawa o tatlong linggo, tapos na rin ang craving. Ito ang listahan that keeps growing and growing...

1. Loaded - hindi ko pa alam na buntis ako nung mga panahong nangungulit ako kay Dexter at Mother para sa Loaded
2. Andok's Litson Manok - iniyakan ko si Sharksfin sa telepono. Disoras ng gabi. Nasa Makati ako. Nasa Caloocan siya. Gusto ko ng Andok's at dahil hindi posibleng maibili niya ako ng manok, pumalahaw ako ng iyak. Last week of August nung mangyari ito. Two weeks ago, bumili kami ng Andok's, nasusuka na ako sa amoy. Hindi ko na gusto. Last week, nagdala si Josie Pussy sa bahay ng Andok's nung dinalaw niya ako. Alam niya paborito ko ang Andok's. Ayun, hindi ko rin natikman.
3. Chowking Chicken Noodles
4. Coco Crunch - hindi ako kumakain nito noon. Napaniginipan ko lang na masarap daw ito with bananas, apple at kiwi. Totoo nga.
5. Champorado ng tita ko - ongoing ito... nagpupustahan na ang mga kamag-anak ko na negro/negra si Potling dahil sa number 1 at 4 - puro maitim. Idagdag pa ang panaka-nakang paghahanap ko ng Hersheys with Almonds at Country Style choco logs (nakalimutan ko ang tawag)
6. Pansit ng tita ko na masarap sa kanin at tuyo (o ayan tuyo, maitim na naman)
7. Buko Juice - hindi masyadong magatas
8. Last week lang, mga 4 AM naghanap ako ng chickenjoy at yum. Ginising ko si Sharksfin. Muntik na niya akong dagukan dahil pagkatapos ng mahabang proseso ng pag-order, pagdating ng chickenjoy, hindi ko kinain.
9. Tocino - life saver. Kapag wala akong magustuhang ulam, ito ang tagapagligtas kaya sa ref namin ay palagi ngayong may imbak na tocino.
10. Jollibee Spaghetti - parang tocino, life saver din
11. Fishballs - oh yes. Maski noon pa.
12. Malamig na malamig na tubig - natuklasan kong panlaban ito sa queasiness - salamat sa nanay ko. Hindi ako palainom ng tubig noon kaya kasama ito sa listahan.
13. Guwapo sa paningin ko si Obama (maitim na naman)
14. Lalong gumawapo sa paningin ko si Bossing (maitim nang kaunti)
15. Parang fishballs, maski noon pa... ligayang ligaya akong amuy-amuyin at panooring matulog si Sharksfin.

May mga nalimutan pa siguro ako - napapansin ko marami akong nakakalimutan these days. May mga prutas naman ano. Mangga, singkamas, ponkan sa madaling araw. Kinatuwaan ko si GIZMO, yung mabait na Gremlin. Takot na takot ang mga tao sa bahay noong mga panahong iyon. Lumalabas ang mga ugat ni Sharksfin habang ginagawa ang signature niyang pabulong na pagtili - wag mo tingnan yan tatlo lang daliri niyan!

Nakakatakot din ha. Pero kapag naglalaway ka na, maiisip mo pa ba ang mga posibleng outcome ng lahat ng kakainin mo o katutuwaan? Gaya nung pinaglihi sa malas, mukhang pera, mukhang ewan. Ay nako. Keber.